ВМРО-ДПМНЕ денеска преку соопштение обвини дека СДСМ и Сорос го корумпираат невладиниот сектор и најавуваат дека десороизација која ја започнале нема да запре.
„Деновиве, како и многупати досега, повторно сме сведоци како овие т.н. граѓански организации повторно се обидуваат да се претстават како автентични и слободоумни претставници на цивилниот сектор, иако документите кои се појавуваат од нивната тајна комуникација уште еднаш го потврдуваат она што целата јавност веќе добро го знае – не се ниту автентични, ниту слободоумни, туку се слуги на политичките интереси на СДСМ/Сорос. Овие организации од кои произлегуваат ликови како Владе Милчин, Павле Богоевски, Ивана Туфекгџиќ, Лидија Димова и други, не го претставуваат вистинското граѓанство во Македонија. Тие го претставуваат само оној слој на граѓани кои одлучиле да сеат магла дека се невладини, а да седат во скутот на СДСМ, на неговите пратенички листи или во извршните органи на партијата“, пишува во соопштението на партијата.
Од ВМРО-ДПМНЕ велат дека Македонија нема потреба од платеници кои за туѓи политички интереси и агенди ќе вршат насилни кампањи против волјата на мнозинството.
„Затоа во Македонија е неопходен процесот на десоросоизација кој започна и од кој враќање нема“, се вели во соопштението.
Изминативе неколку дена, невладиниот сектор испраќа деманти на обвинувањата од ВМРО-ДПМНЕ и движењето „Стоп Операција Сорос“.
Тие порачаа дека доколку не добијат јавно извинување, ќе бараат правда пред суд, поднесувајќи тужби за клевета и за навреда.
„На СОС и на неговите налогодавци очигледно им пречат слободното и независно граѓанско општество, слободата на изразување и, воопшто, сите демократски вредности и принципи. Затоа тие во јавноста пласираат невистини, манипулативни податоци и лажни информации, со намера да го замолчат граѓанското општество, вели програмскиот директор на „Метаморфозис“, Филип Стојановски.