ВМРО ДПМНЕ ги демантира информациите дека наводно човек од обезбедувањето на Никола Груевски дал наредба за активности поврзани со настаните на 27 април.
„Тоа е комплетно неточно. Ниту има таква работа, ниту пак тоа го пишува во обвинителниот акт кој го има поднесено обвинителството. Против посоченото лице не е покренато некакво обвинение, што значи дека се работи за вешто спакувана лага со цел да се манипулира јавноста“ пишува во соопштението од ВМРО ДПМНЕ.
Во ВМРО ДПМНЕ сметаат дека е скандалозно е што во јавноста протече цел обвинителен акт, при што на одговорност треба да се повика Претседателот на Судот Иван Џолев. Според нив случувањата од 27 април се реакција на нелегитмната и нелегалната акција која ја спроведе СДСМ, Зоран Заев и Талат Џафери.
Реакцијата на опозициската партија доаѓа откако во јавноста дел од медиумите објавија делови од обвинителниот акт за насилствата во Собранието од 27 април, во кој се наведува дека повикот за упад во Собранието дошол од телефонски број на член на обезбедувањето на Никола Груевски, кој за време на случувањата беше во Виена.