Партијата ВМРО-ДПМНЕ објави повик до граѓаните за марш утре (3.декември) во 16.30 часот пред Министерството за правда.
„Биди пиреј. Приклучи се на маршот за правдината и за татковината“, гласи повикот на опозициската партија.
Во своето образложение на повикот, ВМРО-ДПМНЕ пишува дека правдината била погазена, а борбата за правдината била должност и света обврска.
„И таа борба започнува со силата на помал број на посветени и непокорни луѓе, за потоа да блесне и да го осветли целото општество. Таа борба подразбира истрајност, страдање, храброст, идеја, чест и име. Биди и ти дел од генерацијата која ја започнува борбата за правдината. Впиши го своето име на светлата страна на нашето секојдневие и нашата иднина. Кога правдината е погазена, Татковината е ослабена. Татковината не може да оди напред кога правото станува неправо, кога реваншизмот станува стил на живот, кога политичкиот прогон прераснува во страст, а покорноста се претвора во вредност. Без правдина – нема Татковина! Затоа непокорот е одговорот! Животот во помал дел е она што ти се случува, а во најголем дел е како ти реагираш на она што се случува. Браќа и сестри, дами и господа, вие сте тие кои реагирате и кои одлучувате! Да покажеме дека сме слободоумни, самосвесни, слободни луѓе, кои не се плашат од ризиците туку смело им пристапуваат, кои не се штедат за да се борат за правдината, и кои не се срамат што си ја сакаат Татковината“, се вели меѓу другото во повикот на ВМРО-ДПМНЕ.