Пратеничката група на ВМРО-ДПМНЕ до Собранието поднесе Предлог закон за дополнување на Законот за пензиското и инвалидското осигурување, по скратена постапка со кој се предвидува зголемување на пензиите за 20%, од месец април 2022 година.
– Имајќи ја во предвид појавата на пораст на цените на одделни производи и
електричната енергија кои се од витално значење за пензионерите како потребата од подобрување на животниот стандарт, сметаме дека треба да се обезбеди зголемување на старосната пензија, но и на сите останати видови пензии. Секој пензионер има право да живее пристојно, со доволно средства да ги подмири основните трошоци за храна, греење, лекови и т.н. Со растот на минималната плата, соодветно е да растат и пензиите, со цел обезбедување на рамноправност и еднаквост на пензионерите со останатите граѓани, рече Никола Мицевски, координатор на ВМРО-ДПМНЕ.
Тој истакна дека, пратениците имаат генерациска должност да се грижат и да ги почитуваат повозрасните граѓани кои во еден период допринесувале за државата со својот труд, за што треба да им бидеме благодарни.
– Доколку не постои зголемување на пензиите, пензионерите ќе
бидат доведени до раб на сиромаштија поради неможност да ги подмират основните животни трошоци. Цениме дека со предложеното законско решение ќе се подобри социјалната положба на корисниците на пензија во 2022 година со порастот на сите видови на пензија за 20%. Преку ова форма на усогласување ќе се зачува реалната вредност на пензиите и се заштитува стандардот на пензионерите. Апелираме до парламентарното мнозинство да го поддржи овој предлог закон и заедно како што се обединивме околу зголемување на минималната плата, да и помогнеме и на оваа категорија на граѓани на кои оваа помош им е неопходна за еден нормален живот, рече Мицевски.