Во соопштение до јавноста, опозициската ВМРО-ДПМНЕ обвинува дека судот бил најдиректен и најодговорен учесник во „се поголемиот раздор и продлабочување на кризата поттикната од катастрофалните политики на владата на СДСМ“.
„Судот е директен соучесник во креирањето на недемократска атмосфера на страв, во која што Заев ќе може без опозиција да носи закони за двојазичност, да ја задолжува земјата или да ратификува договори со кои се брише историјата и македонскиот јазик“, смета партијата.
Оттаму додаваат дека доколку судиите имале интегритет, совест и свест, ќе ги ослободеле сите неправедно притворени лица од 27.април.
„Дурловски, Јовановски, Дамовски, Илиевски, Божиновска, Чавков, Мукоски и останатите неправедно обвинети се жртви на политички прогон само заради храброста, гласно да го искажат своето несогласување“, се вели во соопштението.