Координаторот на советничката група на ВМРО-ДПМНЕ во Аеродром денеска предложи вонредна точка на дневен ред на седницата да бидат мигрантските кампови. Советниците на ВМРО-ДПМНЕ кои се мнозинство во Советот, без да го прочитаат донесениот заклучок го изгласаа без присуство на опозицијата.
По денешната изјава на градоначалникот на Општина Аеродром, Ивица Коневски, во која вели дека не верува дека во неговата општина ќе се градат мигрантски кампови и дека досега сите информации со кои располага се шпекулации, Советот на оваа општина, вечерва на седница, експресно изгласа Заклучок со кој не ја прифаќа Националната стратегија за интеграција на бегалци.
Советниците од СДСМ велат дека на денешната седница воопшто и не требало да се расправа за мигранти, ниту пак за бегалски кампови, но координаторот на советниците на ВМРО-ДПМНЕ оваа точка ја предложил баш пред почетокот на седницата.
„Ние не добивме никаков материјал за оваа точка, а и Општината нема добиено некакво барање или документ од државата за да има врз основа на што да дискутираме. Побаравме пауза да ни достават некаков материјал, но и по паузата освен објаснување дека граѓаните се реално загрижени не добивме ништо“, велат советниците од СДСМ.
Од оваа партија велат дека претседателот на советот, ниту пак предлагачот на точката не го прочитале заклучокот, туку поединечно гласале за него, што значи дека заклучокот го нема ниту во стенограмските забелешки.
„Ние не знаевме за што треба да гласаме, не сакаа да ни го прочитаат заклучокот затоа што се свесни дека целата оваа приказа е лага. Од оваа причина повеќето советници од нашата советничка група ја напуштија седницата“, велат советниците.
Додаваат и дека се обиделе да побараат објаснување зошто ваква точка се става на дневен ред кога и самиот градоначалник денеска во изјава за медиумите рекол дека не верува дека вакви кампови ќе се градат во нивната општина, но советниците од ВМРО-ДПМНЕ објаснувале дека градоначалникот никогаш не дал таква изјава.
Љубица Јанчова, координаторка на советничката група на СДСМ вели дека целта на ова што го прават советниците на ВМРО-ДПМНЕ е само за да го свртат вниманието од реалните проблеми на граѓаните.
„Сакаат мигрантите да ги искористат како што тоа го направија со федерализацијата, кантонизацијата и сите други лаги кои ги употребуваа за предвремените парламентарни избори. Ние сметаме дека требаше барем да ја запазат процедурата, но они денеска ни тоа не го направија“, вели Јанчова.
Оваа партија формално не стои зад иницијативите за собирање потписи против бегалски кампови во Аердром, но НОВАТВ интервјуираше дел од припадниците на овие таканаречени граѓански иницијативи кои што самите кажуваа дека доаѓаат од ВМРО-ДПМНЕ.