Седницата на Комисијата за политички систем на која требаше да се разгледува извештајот на Специјалното обвинителство, повторно е одложена. Претседателот на Комисијата – Влатко Ѓорчев ја повика Јанева лично да се појави, бидејќи во спротивно нема услови за одржува на седницата, додека пак, од СДСМ реплицираа дека Ѓорчев го нема утврдено ниту дневниот ред, а кани луѓе на седницата.
-За жал не се создаде условите за отпочнување на Комисијата за политички систем. Собранието е највисокиот законодавен дом во Македонија. Тука 25 години наназад доаѓале сите претседатели на државата и Глигоров, и Трајковски и Црвенковски и Иванов. Доаѓаат сите премиери, сите министри, сите избрани и именувани функционери. За жал госпоѓата Јанева смета дека не треба да дојде во овој Парламент, рече Ѓорчев.
Членовите на Комисијата од редовите на СДСМ и денеска не се појавија на седницата, бидејќи според нив, Ѓорчев го нема утврдено ниту дневниот ред, а објаснува дека нема услови за работа. Пратеникот Горан Сугарески вели дека од 2005 државен јавен обвинител се нема појавено да образложува лично Извештај.
-Не знам дали знаете од 2005 тука, не е разгледан Извештај од државното Јавно обвинителство. Прво, кршење на Деловник е да објаснувате дека нема услови за одржување на седница, бидејќи нема претставник, а претходно да немате утврдено дневен ред. На Комисија дневниот ред не е утврден. Не знам зошто не се утврдува дневниот ред, па после ако мисли по негово господинот Ѓорчев дека нема услови тоа може да го констатира. Таму нема утврден ред и не гледаме причина да учествуваме во тој циркус и театар, вели Сугарески.
Од СДСМ велат дека ќе учествуваат во работата кога господинот Ѓорчев ќе го утврди дневниот ред.
Ова е четврти обид да отпочне седница на Комисија за политички систем за да се разгледа извештајот на СЈО.
Пратениците нема да може на собраниска седница да го оценуваат Извештајот на Јанева се додека тој не го помине првиот филтер. Од Специјалното јавно обвинителство остануваат на ставот дека тие немаат обврска да го презентираат лично Извештајот, бидејќи според нив, тој е краток и концизен и не се законски обврзани усно да го презентираат.
Согласно Законот за специјално јавно обвинителство, Катица Јанева е должна на секои шест месеци да доставува извештај за својата работа и напредокот на истрагите до Советот на јавни обвинители и Собранието на Република Македонија, како надлежни тела.
Вчера, Јанева кратко се појави во Советот на јавни обвинители уште еднаш да појасни дека нема обврска да дава отчет, а Советот без образложение, нејзиниот извештај го оцени за негативен.