Вкупно 45 новинари и медиумски работници се убиени во текот на својата работа оваа година, а повеќето од нив ги загубиле животите во Авганистан, соопшти денеска Меѓународната федерација на новинари (ИФЈ).
ИФЈ, која претставува околу 600.000 медиумски професионалци ширум светот, соопшти дека 45 новинари и медиумски работници биле убиени во 20 земји, од кои 33 биле убиени во целни напади.
Девет лица загинаа во Авганистан, осум во Мексико, четворица во Индија и тројца во соседен Пакистан. Организацијата соопшти дека од 1991 година ширум светот биле убиени 2.721 новинар.
За потсетување, во 2020 година се регистрирани 65 починати.
„Овие 45 колеги што ги загубивме во насилство оваа година не потсетуваат на страшната жртва што новинарите ширум светот продолжуваат да ја плаќаат за служење на јавниот интерес, а ние остануваме должни ним и на илјадници други кои платија највисока цена“, изјави Ентони Беленџер генерален секретар на ИФЈ.
ИФЈ, исто така, наведува дека бројките во 2021 година го потврдуваат трендот дека медиумскиот персонал најчесто се убива поради разоткривање на корупција, криминал и злоупотреба на власта во нивните заедници, градови и земји.
Оваа година оваа бројка е најниска во последните 30 години откако ИФЈ првпат почна да објавува годишни извештаи за новинари убиени во инциденти поврзани со нивната работа.