На хируршкото одделение во болницата „8 Септември“ се незадоволни поради затворањето на нивниот оддел и намалување на бројот на болнички кревети, дознава НОВА од свои извори во болницата. По одлуката за реорганизација заради недостиг од медицински сестри, 10 кревет од општа и ургентна хирургија се префрлаат на дигестивна хирургија и урологија и одделението се затвора. Исто така, десет кревети од одделението за пулмологија ќе бидат префрлени на гастроентерехепатологија, а ендокринологија оди на кардиологија. Незадоволни од одлуката, наводно вработените на хирургија потпишуваат петиција заради ваквата одлука на раководството на болницата.
„Не знам, до мене такво нешто досега не стигнало“, изјави кратко Зоран Стојановски заменик директор на болницата „8 Септември“.
Началникот на хируршкиот оддел Санде Стојановски потврди дека имало собирање на потписи, но нагласи дека ќе ја почитуваат одлуката на раководството, како и дека нема најава за протести како што се шпекулира во јавноста.
„Ние имаме навала од пациенти, но ќе ја почитуваме одлуката на директорот. Нема ништо од таа петиција. Н а одделот имаме доволно медицински сестри, но секако нема доволно во операционите сали. Знам дека интерно одделение барале да се направи реорганизација, ние не“, изјави Стојановски за НОВА.
Од друга страна, директорот Сашо Стојчев потврди дека реорганизацијата е во тек, се преместуваат болнички кревети и од понеделник дефинитивно ќе бидат затворени одделенијата за Пулмологија со ендокринологија и Општа и ургентна хирургија. Стојчев потенцира дека болницата ќе работи со намален капацитет со 75 кревети помалку, а причината за сето ова е недостигот на медицински сестри. Болницата затвори и четири операциони сали, па сега наместо со седум работи само со три операциони сали.
„ Целта на сето ова е за да ги одмориме малку медицинските сестри, преморени се, постојано дежураат. Инаку, граѓаните треба да знаат дека итните случаи нема да се враќаат, сите ќе бидат оперирани кои се итни. Ќе бидат одложени само закажаните операции кои што можат да чекаат“, изјави Стојчев за НОВА.
Минатата година според методологија на Министерството за здравство се констатира дека во болницата треба да се вработат 180 медицински сестри, не вклучувајќи ги физиотерапевтите и лаборантите. Конкурсот кој беше распишан пропадна бидејќи министерството не ги испрати тестовите за кандидатите. Веднаш потоа пропадна и финансиската согласност. И токму заради тоа дел од вработените во болницата се зачудени како е возможно Владата да распишува оглас за финансиска поддршка на здруженија и фондации во вредност од 50 милиони денари или 800.000 евра, а да ја поништи финансиската согласност за вработување на 60 медицински сестри, кои се неопходни и е главна причина поради која болницата колабира.
Од Министерството за здравство се уште не се изјасниле дали работат на тоа да го решат проблемот во болницата и како планираат да го сторат тоа.