Од предвидените 64 работни места пополнети се 34 во Државната комисија за спречување на корупцијата, што претставува 53 отсто пополнетост, се вели во годишниот извештај за работењето на Комисијата во 2021 година.

Билјана Ивановска претседателка на ДКСК, на прашањето на Нова ТВ зошто досега не се пополнети и останатите места, вели дека причина се неодобрени финансиски средства за нови вработувања.

-Од 2019 година секоја година поднесуваме план за вработување до Министерство за финансии за пополнување на работните места предвидени со систематизациата но во 2020 година запре тој процес поради пандемијата. Минатото лето исполнивме максимум слободни места, а сега чекаме да ги пополниме и останатите, вели  таа.

Според Катица Николовска од ДКСК, има огромен интерес за вработување и тоа на речиси сите позиции објавени досега.

-За сите позиции досега пријавеноста е огромна. Имаме 270 пријави за 13 месеци и има огромна разлика во однос на пријавеноста од минатата година.

Иако државата  на светските мерења покажа подобар резултат во однос на минатите години, сепак корупција и натаму е еден од главните проблеми во Северна Македонија. Според Транспаренси Интернешенл нашата земја во 2021 беше рангирана на 87 место според индексот на перцепција за корупцијата, што е подобар резултат за 24 места од претходната година кога бевме позиционирани на 111 место од вкупно 180 земји.

Амбасадорката на САД Кејт Мари Брнз деновиве упати порака со загриженост поради застојот во земјава на планот на борбата против корупцијата. „Намалувањето на корупцијата ја зајакнува националната безбедност. Кога граѓаните чувствуваат дека не можат да успеат во нивниот систем поради корумпирани административци или коруптивни практики, тоа има негативен ефект врз општеството. Корупцијата води кон лажни, па дури и кон насилни наративи. Корупцијата ја еродира довербата на граѓаните во институциите. Белата куќа кажа дека антидемократските сили ја користат корупцијата како оружје за да ги искористат слабостите и поделбите меѓу слободните држави“, рече таа.

Претседателката на Државната комисија за спречување на корупцијата Билјана Ивановска на денешниот брифинг со новинарите посочи дека корупцијаи натаму е широко распространета во земјава.

„Нема каде нема корупција. 50 отсто од активностите за спречување корупција не се ни започнати со реализација, односно реализирани се само 20 отсто од нив, а ова е загрижувачки податок. Сакаме Собранието да потпише одговорност и отчетност за оние кои не ги спроведуваат активностите предложени со националната стратегија за спречување корупција бидејќи законот е донесен, изгласан и треба да се почитува“, истакна таа наведувајќи дека министерствата за труд и социјала и за земјоделие, како и во спортот, има речиси целосна незаинтересираност за имплементација на мерките од Националната стратегија за спречување на корупција.

Како што потенцира Ивановска, поради промена на кадри во министерствата има тешкотии за обезбедување на податоци за тоа каде има корупција, а додека граѓаните се жалат и за нефункционалност на инспекциските служби.

„Бараме силен механизам за институционална одговорност и интензивирање на активностите во Собранието и да се обезбедат средства за ДКСК за подобра комуникација со институциите“, порача таа. (М.Т.)