Во зградата на Европскиот парламент во Брисел вчера беше отворена изложбата „Заедно II“, која ја организира Бугарскиот културно-информативен центар во Скопје (БГКИЦ) во соработка помеѓу министерствата за култура на Република Бугарија и на Република Северна Македонија, а со поддршка на европратеникот и известувач за Северна Македонија, Илхан Ќучук.
Како што соопштија од Бугарскиот културно-информативен центар, специјален гостин на отворањето на изложбата беше претседателката на Европскиот парламент Роберта Мецола.
– Европската унија и овој парламент се посветени на унапредување на долгорочните односи меѓу Бугарија и Северна Македонија. И ќе продолжиме да ги охрабруваме двете страни на дијалог и работа за заедничка европска иднина. Оваа изложба има за цел да го прослави заедништвото меѓу Бугарија, Северна Македонија и Европскиот парламент, рече Мецола.
Европратеникот Ќучук се заблагодари на директорката на БГКИЦ-Скопје, Антонија Велева, која ја покрена иницијативата за изложбата и додаде дека ова треба да биде патот напред и за Бугарија и за Северна Македонија.
-Двете земји треба да ги продлабочат своите добрососедски односи и да се залагаат за интеграција на регионот во Европската унија. Ова е пример дека културата е мост кој обединува и не познава граници, дека културата има моќ да се издигне над сите разлики, рече Ќучук.
Меѓу присутните беа и постојаниот претставник на Бугарија во ЕУ, амбасадорот Румен Александров, како и амбасадорот на Северна Македонија во Европската Унија, Зулфи Исмаили. Двајцата истакнаа дека изложбата ја покажува взаемната волја за одржување на позитивната агенда меѓу двете земји.
-Важноста на меѓукултурниот дијалог и соработка меѓу Бугарија и Северна Македонија стана повидлива во последниве години. Денешниот настан е уште еден доказ во оваа насока. Заедничките вредности и наследството се составен дел од нашата иднина, рече амбасадорот Александров.
Амбасадорот Исмаили се заблагодари на министерствата за култура на двете земји. Уметноста е универзален јазик и треба повеќе да ја промовираме.
-Гледајќи ја оваа изложба непосредно пред ова отворање, го видов неограничениот потенцијал на уметноста да инспирира, предизвикува и да ги трансформира нашите перспективи, додаде Исмаили.
Кураторите Ана Франговска од Северна Македонија и Атанас Андасаров од Бугарија ја претставија првата заедничка изложба на двете земји пред присутните гости на свеченото отворање во зградата на Европскиот парламент.
Заедно II“ за првпат беше претставена во Скопје на 25 ноември 2022 година, кога свечено беа отворени новите простории на Бугарскиот културно-информативен центар во Скопје и беше дел од годишната програма на институцијата. Од бугарска страна на изложбата учествуваат скулпторката Снежана Симеонова со делото „Форма“ и сликарите Свилен Блажев со „Рабош“, Вихрони Попнеделев со „Триптих“, Греди Аса со „Историја“ и „Внатрешен простор“; Надежда Кутева со „Манастирот 1“ и „Градски пејсаж“ и Атанас Андасаров со „Св. Наум“ и „Персимон“ и други.
Од уметниците од Република Северна Македонија на изложбата се претставија сликарите Жанета Гелевска-Велјаноска со делото „Пејзаж“, Симонида Филипова-Китановска со „Композиција“, Илија Кочовски со „Пејзаж 2“, Александар Станкоски со „90.000 овци“, Жаклина Глигориевска-Кочовска со „Возбуда или за потеклото“, Марина Цветановска-Мартиновска со „Ни на небо ни на земја“, Дијана Томиќ-Радевска со „Цветовите на Галичник 1“, Марина Лешкова со „Галичник“ и други, стои во соопштението.