Податоците кои денеска ги објави министерот за информатичко општество и администрација Дамјан Манчевски за вработените во јавната администрација покажуваат родов дисбаланс во многу сектори.
Најизразена е ситуацијата во Уставниот суд каде што 90 проценти од вработените се жени. Ваков сооднос, но во корист на мажите има во секторот животна средина и во транспорт каде што речиси 90 проценти од вработените се мажи.
Жените доминираат во секторот труд и социјала каде што од вкупниот број на вработени 79 проценти се жени, во здравството – жените се 70 проценти од вкупниот број на вработени, во образованието – повеќе од 60 проценти, колку што се и во правосудството и во јавното обвинителство. Интересен е и податокот дека кај претседателот на државата, исто така повеќе од мнозинството вработени или 66 проценти се жени.
Мажите пак доминираат во информатичкиот сектор, комуналните работи и во секторите земјоделство и правда. Во овие сектори од вкупниот број на вработени околу 80 проценти се мажи.
Родов баланс има само во културата каде што речиси е изедначен бројот на вработени мажи и жени и во секторите управа и информирање.
Во вкупниот број на вработени во администрацијата 54 проценти се жени, а 46 проценти се мажи, но нема податоци за позициите кои ги извршуваат и за висината на платите кои ги примаат.
Манчевски денеска кажа дека вкупниот број на вработени администартивци во 2017 година е 139 оо9. Од нив 128.722 се вработени во јавниот сектор, каде исто така има уште 1.624 лица кои работат според Агенцијата за привремени вработувања. Во акционерските друштва со 100 % државна сопственост вработени се 8.633 вработени, а преку Агенцијата за привремени вработувања анагажирани се 30 лица.
Според министерот за информатичко општество и администрација Дамјан Манчевски, бројот на вработени преку Агенциите за привремени вработувања е намален за 950 лица, во споредба со 2016 година, а во акционерските друштва пак, бројот на вработени се намалил за 400 лица.
Најмногу вработени има во секторите образование и здравство, каде што работат половина од вкупниот број на административци. Потоа следува министерството за внатрешни работи со речиси 12 000 вработени и министерството за одбрана со 7.000 вработени.