Во Косово денеска ќе се одржат бројни манифестации по повод 15-годишнината од прогласувањето на независноста, вклучувајќи свечени седници на парламентот и владата, паради на припадниците на косовските безбедносни сили и косовската полиција и други културно-уметнички активности.
Официјалната седница на владата ќе се одржи претпладне во Приштина, по што ќе следи подигање на знамето на јарболот пред седиштето на извршната власт. Свечената седница на косовскиот парламент ќе се одржи по свечениот концерт на Косовската филхармонија во Собранието.
Парадата на припадниците на косовските безбедносни сили и на косовската полиција ќе се одржи во центарот на Приштина, а ќе ја следат највисоките претставници на Косово, претставници на дипломатскиот кор и граѓани.
Предвидено е да се положи цвеќе на споменикот на исчезнатите, на гробовите на поранешниот претседател на Косово Ибрахим Ругова, политичарот Адем Демаќи и првиот командант на Ослободителната војска на Косово Адем Јашари, како и на споменикот на хероите за кои се смета дека „ги положиле животите за слободата на Косово“.
Пред Народниот театар во Приштина ќе се запалат 1.133 свеќи, што според официјалните податоци од Приштина е бројот на загинати деца за време на војната во Косово во 1998-99 година.
Претседателката на Косово, Вјоса Османи, ќе приреди прием за највисоките претставници на Косово, пратеници, министри, претставници на дипломатскиот кор и други високи личности, а свечен „Концерт на независноста“ ќе се одржи во спортската сала „Први Октомври“ во Приштина во организација на Радио и телевизија на Косово.
Свечености по повод Денот на независноста на Косово денеска ќе се организираат и во другите косовски општини, а приеми ќе бидат организирани и во дипломатските претставништва на Косово.