Познатиот холандски новинар, Питер де Вријс е во критична состојба, откако во него синоќа било пукано од огнено оружје во центарот на Амстердам, јавија холандските медиуми. Де Вријс (64) е сериозно повреден во нападот и веднаш бил хоспитализиран.
Нападот се случи само неколку минути откако тој ја напушти зградата на РТЛ каде учествуваше во популарното телевизиско шоу „Булевар РТЛ“. Полицијата потврди дека привеле три лица осомничени за нападот.
Де Вриес се стекна со слава уште во раните 80-ти години на минатиот век кога известуваше за киднапирањето на магнатот Фреди Хајнекен.
Од 1995 до 2012 година тој водеше популарна емисија на холандската телевизија која опфаќаше познати случаи од рубриката „Црна хроника“. Во врска со повеќе случаи, на Де Вриес му се закануваше криминалното подземје, а пред две години тој самиот напиша на Твитер дека полицијата го предупредила дека се наоѓа на „списокот за отстрел“ на криминалец во бегство.