Лидерот на ВМРО-ДПМНЕ, Никола Груевски, во денешниот свој говор на Годишната конференција на Унијата на жени на партијата, во замислено сценарио ги критикуваше сите свои политички опоненти, странските амбасадори, Специјалното јавно обвинителство и новинари и невладини организации.
Осврнувајќи се на случајот со Диме Спасов, кој ја разбрани јавноста, Груевски вели реакциите ќе биле поинакви доколку во случајот на Спасов, било лице од СДСМ, а министер во МВР би бил од ВМРО-ДПМНЕ.
„После хајката со Диме, мислам дека и на последниот човек во земјава се му јасно. Снимките јасно одговорија на што и немам што да додадам. Само можам да замислам што ќе се случеше ако беше обратно.
Јунаците од СДСМ со трчење и плачејќи ќе отидеа во сите амбасади во земјава. После некои од амбасадорите мераклии на Твитер ќе испратеа некоја порака преку Твитер и ќе побараа итна средба за половина час кај мене а првата реченица ќе им беше дека нивните главни градови се згрозени и шокирани. Па за еден час или два ќе твитнеше некој странски министер во поддршка на амбасадорите онака случајно и несинхорнизирано, следеле ситуација во земјава.
Потоа најмалку пет амбасадори ќе прочитаа нешто под прозорот или во штабот во смисла дека демократските процеси се загрозени, дека се многу загрижени, дека бараат да се расчисти случајот, дека ќе влезе тоа во сите можни извештаи, дека ќе има одговор и санкции. До вечерта сигурно и 2-3 министри за надворешни работи ќе изразеа загриженост, осуда, одлибску ќе мониторираат, па дека ова не оддалечува од НАТО и ЕУ.
Од утредента сите невладини организации на еден познат светски филантроп ќе се изредеа и нивните домашни платеници ќе се испотепаа кој повеќе да нападне небаре хонорарот кој треба да го добијат е по учинок.
Во целата таа гужва, најсреќен ќе беше СДСМ и Зоран Заев. Ете им причина пак да најават бојкот. Заев ќе го најавеше излегувањето од изборниот процес. На ова ќе се налепеа разни маргиналци и платени новинари и по некој глумец, пејач, спортист, лекар, професор и натаму за да е разноврсно за да одработат хонорар.
Ама бидејќи сега е обратна сиуацијата, сега од амбасадорите нема ниту глас ниту реакција, не се они такви што сакаат да се мешаат“, е сценариото кое го опиша Груевски.
Меѓу другото, Груевски порача дека Зоран Заев знаел дека ќе ги изгуби изборите во декември бидејќи немал што да понуди, затоа што никој не верувал дека може да биде премиер.
– Затоа што сите знаат дека тоа што денес го кажува утре нема никаква вредност. Зборот за него не вреди, рече Груевски во својот говор.