Под мотото „Интеграцијата е целта, соработката е начинот“ денеска во Охрид се одржува состанок на министрите за одбрана на САД и на земјите од Јадранската повелба на кој се очекува да се реафирмира и конкретната поддршка од сите земји на намерите и заложбите на Република Македонија за постигнување на полноправно членство во НАТО.
На состанокот во Охрид учествуваат заменик-помошник на секретарот за одбрана на САД Лора Купер, министри за одбрана или официјални претставници на земјите членки Албанија, Босна и Херцеговина, Хрватска, Македонија и Црна Гора, како и министерот за одбрана на Бугарија, и министрите за одбрана или официјални претставници на земјите набљудувачи, Косово, Србија и Словенија.
– Република Македонија не бара членството во НАТО да го добие како подарок. Тоа не е ниту тоа е стекнато право, туку тоа да е резултат на посветеност, исполнети критериуми и континуирана стабилност. Тоа го истакна министерката за одбрана Радмила Шеќеринска на отворањето на состанокот.
Според Шеќеринска, постои решителност за затворање на отворените проблеми кои досега непотребно се развлекуваа, ги оптоваруваа односите со соседите и се наметнаа како реални пречки на за евроатлантските интеграции.
– Македонија полека излегува од еден тежок период предизвикан од пролонгираната политичка криза. Период полн со предизвици, во кој граѓаните покажаа мудрост, зрелост, одважност и демократски капацитет, и недвосмислено се изјаснија за насоката кон која посакуваат земјата да се движи и стратешките приоритети, истакна Шеќеринска.
На состанокот говореше и премиерот Зоран Заев кој потсети дека токму Јадранската повелба беше мотивацијата што ги водеше земјите членки за рекордно време да ги достигнат стандардите за членство во НАТО, притоа изразувајќи жалење што Македонија во Букурешт остана пред вратата на Алијансата поради спорот со Грција, независно генералната оценка дека земјата ги исполнила сите критериуми.
Тој забележа дека од тогаш Македонија беше втурната во ретроградни политички процеси кои кулминираа со најтешка политичка криза во земјата по осамостојувањето.