Откако стигнаа безброј предупредувања дека ќе снема полупроводници, алуминиум, челик, магнезиум, кои се основни суровини за каблите што се користат при склопувањето на возилата, сега има најава за недостиг од автомобилски гуми, пишува германски Шпигел. Имено, поради тешкотиите во набавката на саѓи, предизвикани од војната во Украина, на Европа и се заканува недостиг на автомобилски гуми.
Избувнувањето на војната во Украина индиректно доведе до овој проблем бидејќи саѓите за производство на гуми се добиваат со преработка на фосилни горива. Саѓите се една од виталните суровини во многу индустрии, вклучително и за производството на батерии, акумулатори и автомобилски гуми. Притоа околу 60 отсто од саѓите што ги троши германската индустрија, која е и главен производител на автомобили на континентот, потекнува од Руската Федерација. Со оглед на тоа што трговската размена и економската соработка меѓу двете земји се намалуваат поради војната, испораките на оваа суровина се прекинати, а во исто време се тенчат достапните залихи. Фактот дека Кина, Индија и Саудиска Арабија можат да ја снабдуваат Германија и другите западни земји со оваа суровина, тешко дека значи нешто, бидејќи е потребна околу една година за соодветно прилагодување во синџирот на снабдување.
Затоа и се очекува недостиг на гуми на пазарот, пред се поради недостигот на јаглерод во споменатата форма, што ќе се почувствува во следните неколку месеци. За тоа особено сведочат извештаите дека европските производители на гуми ги намалуваат плановите за производство за 2022 година.