По поднесено барање од страна на оштетеното лице до Општината за издавање на Решение за утврдување на правен статус на бесправно изграден објект-куќа, изградена во јуни минатата година, пријавениот, со намера да го искористи своето претпоставено влијание и наводна службена положба, ветил дека ќе издејствува легализација на објектот. С.М. од оштетениот на 19 јануари побарал за себе парични средства во износ од 2.500 евра, а на 27 февруари примил дел од средствата во износ од 1.000 евра.
Оштетениот на 22 јануари годинава годинава, во просториите на Секторот за внатрешни работи Скопје-Единица за економски и компјутерски криминал поднел кривична пријава против пријавениот С.М.
На 27 февруари оштетениот дал дополнително известување дека со пријавениот С.М. истиот ден околу 11 часот, се сретнал во просториите на општина Шуто Оризари, каде на барање на пријавениот, му дал парични средства во износ од 1.000 евра, претходно фотодокументирани, додека остатокот требало да го исплати по добивање на Решението за легализација, кое му ветил дека ќе биде завршено по два дена.
Од страна Секторот за внатрешни работи Скопје, а врз основа на Наредба за претрес на службени простории и претрес на лице издадена од Основен суд Скопје 1 Скопје, извршен е претрес во општината и врз пријавениот, кој доброволно предал една банкнота од 500 евра, две банкноти од по 200 евра и една банкнота од 100 евра кои се претходно фотодокументирани.
Вработениот во општината беше приведен пред неколку дена под сомение дека земал мито за легализација на куќа.