Седумтемина осудени на доживетен затвор за престрелката во кумановско „Диво насеље“, која се случи во мај 2015 година, денеска од највисокиот, Врховниот суд, побараа да бидат ослободени и судскиот порцес да се врати на почеток. Тие тврдат дека не биле тероисти. Одбраната ја повика власта да каже кој го организирал нападот. Адвокатите на денешната јавна седница пред врховните судии наведоа дека за време на судската постапка во скопскиот Кривичен суд имало пропусти во водењето на самиот судски процес. Не можеле да презентираат докази, ниту да сослушуваат сведоци. Адвокатот Насер Рауфи во изјава за медиумите тврди дека осудените не се ниту организатори на терористичкото сценарио. Тој вината ја вперува на Агенцијата за разузнавање и тогашната Управа за безбедност и контраразузнавање.
-Самиот Али Ахмети даваше интервју и кажа дека разговарал и согласно тој разговор да ни беше овозможено да биде дел од доказите, ќе се утврдеше дека моите клиенти Деме Шеху и Аднан Красниќи не биле организатори на настанот, вели адвокатот Насер Рауфи.
Одбраната ја повика власта да каже кој ги организирал кумановските инциденти од мај 2015 година, бидејќи тврдеа дека такви докази има.
-И сегашниот претседател Стево Пендаровски и директорот на ДБК, во изјави на телевизија за овој период кажуваа дека ќе обезбедат нови докази, дека „Диво Насеље“ не е тоа што е, и имало нови докази. Тие докази ги нема никаде, или да се процесуира нов предмет. Мое лилно мислење и за оваа позиција и за 27 април е дека организаторите се исти. Да се дојде до власт се направи малку раздор, ограничено пукање за да дојдеме до власт, вели адвокатот Љупчо Веселиновски.
За разлика од одбраната, обвинителството смета дека судската постапка пред Кривичниот, а потоа и пред Апелациониот суд се водела на законски начин и немало пропусти во водењето на постапките. Обвинителството побара од врховните судии да ги одбијат жалбите на осудените и да ги потврди пресудите.
Во случајот „Диво Насеље“ осудени се 33 лица, дел на доживотен затвор, други на 40 години затворска казна. Дали ќе има ослободување и враќање на процесот на почеток како што бараат осудените, или потврдување на казните и одбивање на жалбите како што бара Обвинителството, ќе одлучи Врховниот суд.