Слоун Стивенс ја освои шестата титула во кариера, прва по ланското издание на Ју-Ес опен, и за првпат ќе биде во топ 10 на ВТА ранг листата што ќе биде објавена во понеделник. Американката во финалето на Мастерсот во Мајами ја совлада Јелена Остапенко од Летонија со 7:6, 6:1 за нешто повеќе од еден час игра пришто што имаше голема помош од грешките на актуелната освојувачка на Ролан Гарос.

Воведниот сет донесе дури осум брејкови, па одлуката на чија страна ќе заврши падна во тај-брејк. Стивенс беше поприсебна во тој период од натпреварот, го реши 13. гем во своја корист со 7:5 што и донесе и психолошка стабилност во наредниот иако забележа само три директни поени во целиот сет.

Стивенс заигра послободно во продолжение на мечот за титулата, ја опушти раката и тотално ја разоружа Остапенко. Експресно го врати одземениот гем на сопствен сервис и одговори со освојување на шест во низа и без никакви проблеми го приведе финалето до крај.

ВТА Мастерс во Мајами – награден фонд  8,648,508 милиони долари

Финале: Стивенс (САД) – Остапенко (Летонија) 7:6, 6:1