Македонскиот фудбалски шампион Шкендија го промовира Александар Чешмеџиев во свој нов член. Дефанзивецот пристигнува под Шара од тимот на Академија Пандев чиј дрес го носеше во изминатата сезона.
„За мене е голема чест што станувам дел од екипата на Шкендија која оваа година ја освои двојната круна. Му благодарам на клубот за укажаната шанса и ќе дадам максимум за оправдување на довербата. Чувството е прекрасно кога ќе потпишете со еден од најдобрите клубови во земјата“, истакна Чешмеџиев.
За клубот од Тетово ова е второ засилување по завршување на сезоната, откако претходно потпиша договор и со Ремзифаик Селмани.
Во меѓувреме Шкендија ги продолжи договорите со дефанзивците Мевљан Мурати, Благоја Тодоровски, со Бесмир Бојку и со напаѓачот Изаир Емини.
Тетовскиот клуб сезонава доминираше во домашниот шампионот, а освојувајќи го Купот на Македонија стигна и до двојната круна.
Шкендија најави засилувања на скоро сите позиции во пресрет на квалификациите за Лигата на шампионите.