Мексикански фоторепортер почина, откако беше застрелан во главата пред неговата куќа во северниот пограничен град Тихуана, соопштија официјални лица. Тој е втор медиумски работник кој е убиен оваа година во Мексико, по смртта на Хозе Гамбоа минатата недела во југоисточната држава Веракруз.
Маргарито Мартинез (49) работеше во Тихуана за неколку национални и меѓународни новински куќи повеќе од 10 години, известувајќи за криминал и насилство од банди во градот на американско-мексиканската граница.
Канцеларијата на главниот државен обвинител соопшти дека службениците кои се јавиле на повикот на Брзата помош го пронашле телото на Мартинез пред неговата куќа со повреда на главата предизвикана од огнено оружје.
Според еден од неговите колеги, Мартинез бил вклучен во државна програма чија цел била заштита на животите на новинарите.
Тихуана е еден од градовите во Мексико со најмногу насилство поради судирите меѓу нарко бандите кои се борат за шверцерски рути.
Од 2000 до 2021 година, групата за човекови права „Член 19“ регистрирала 145 убиства на новинари во Мексико, а минатата година биле убиени седум новинари.