Српскиот премиер Александар Вучиќ на прес конференција попладнево рече дека косовските специјалци сакале да ја минираат пругата и да го уапсат машиновозачот на првиот српски воз кој по 18 години сообраќа на релацијата Белград-Косовска Митровица.
-Изутрина во 8.30 часот за Косовска Митровица од Белград е пуштен воз, повторувам воз, а не тенк или оклопно возило. Патнички воз, кој треба да ги спојува луѓето, градовите, во согласност со принципите на меѓународното право, на законите на сите земји во светот и на стандардите на Европската унија.
-Ние вечерва дознавме дека Албанците, нивните специјални сили се обиделе да минираат дел од пругата. Пуштиле свои единици, само од Албанци составена единица од Лужане. Ги пуштиле и кај Јариње со цел да го сочекаат возот, да го уапсат машиновозачот и патниците. Албанците и без ничие одобрување пуштија 17 блиндирани оклопни возила од типот “кобра“ со свои специјалци на северот на Косово со цел да испровоцираат инцидент. Мојата одлука беше да го запрам возот. Ова е мојата последна молба и предупредување до Албанците на Косово и Метохија и моја порака до Србите да останат на своите огништа. Мојата молба до Албанците е да не се обидуваат да го нападнат српскиот народ на Косово и Метохија со оружје, бидејќи Србија тие напади нема да ги дозволи, рече Вучиќ.
Вучиќ рече дека за денешната ситуација разговарал со Брисел, а допрва ќе ги извести и раководствата на Русија и на Кина. Тој нагласи и дека ќе стапи во контакт со американскиот потпретседател Џозеф Бајден.
“Ја известив Могерини дека сум разочаран од реакцијата на ЕУ на овие случувања. За овие случувања ќе ја известиме и Русија, утре и Кина и потпретседателот на САД, за да ги известиме дека Приштина игра воени игри. Србија сака мир, Србите ги повикувам да останат мирни, а моето последно предупредување и молба до Албанците на Косово и Метохија е да не се обидуваат да ги нападнат Србите со оружје, зашто Србија тоа нема да го дозволи”, изјави Вучиќ.
Нaјвено е дека утре ќе се одржи седница нa Советот за национална безбедност.