Српскиот претседател Александар Вучиќ по седницата на Советот за безбедност и потоа по средбата со српскиот патријарх Иринеј изјави дека во изминатите денови е забележано „агентско дејствување од разни центри на моќ“ со што алудира дека нешто „страшно се крчка“ во земјата.
„Ние подобро ќе се подготвуваме, ќе одговараме посериозно и ќе го чуваме мирот и стабилноста, и со нас нема да се шегува целиот свет заради тоа што некој не ги исполнил своите обврски од Бриселскиот договор“, изјави Вучиќ пред новинарите, додавајќи дека „ќе се настојува да се засили преговарачка позоција на Србија.
Српскиот претседател кажа дека на седницата се донесени повеќе важни мерки, одлуки и предлози за Владата и за силите за безбедност, со цел зајакнување на борбената готовност и подготвеност за сите идни предизвици, додавајќи дека некои одлуки не се за јавноста.
Одговарајќи на прашањето за „агентските дејствувања“, Вучиќ рече дека „надлежните српски служби добиле конкретни задачи по ова прашање“.
„Станува збор за различни странски служби, и нашите агенции се занимаваат со оваа работа“, рече тој, додавјќи дека „странските служби се мешале во политичкиот и медиумскиот живот“, доведувајќи ја Србија во положба што сега мора да одговара на трачеви, а не за неспроведувањето на единствената обврска на Приштина – формирањето на Заедницата на српски општини.
На прашањето на новинарите да објасни што е тоа конечно компромисно решение, Вучиќ кажа дека „конечно решение ќе биде тогаш кога ќе биде конечно, но не пред тоа и за тоа ќе говори ако биде можно да се дојде до такво решение. Засега такво решение нема и не го ни имаме добиено. А дали е на повидок? Мислам дека не е. Не сум оптимист за ова“, заклучи Вучиќ.