Аргентинската фудбалска ѕвезда Лионел Меси доби забрана за репрезентативни настапи во наредните три месеци. Одлуката ја донесе Јужноамериканската фудбалска конфедерација (КОНМЕБОЛ) за коментарите на капитенот на „гаучосите“ на Копа Америка.
„Не мора да бидеме дел од оваа корупција. Покажаа недостаток на почит кон нас за време на целиот турнир. Корупцијата и судиите, за жал, не дозволуваат да уживаме во фудбалот. Се уништија“, рече Меси по завршување со настапите на годинашното издание на Копа Америка.
Бразил во полуфиналето ја елиминира Аргентина по триумфот со 2:0, а Меси беше исклучен во 37. минута во мечот за бронзениот медал по што следуваа неговите остри критики на сметка на КОНМЕБОЛ и судиската организација.
Меси може да поднесе жалба за суспензијата во рок од седум дена. Одлуката на КОНМЕБОЛ значи дека тој нема да може да настапи за Аргентина против Чиле, против Мексико и против Германија во септември и во октомври.