„ Македонија и Грција го зајакнуваат пријателството. Со премиерот Ципрас веруваме дека можеме да најдеме решение кое го штити достоинството на граѓаните на двете држави – напиша премиерот Заев на Твитер, по средбата со грчкиот премиер Ципрас на Самитот ЕУ- Западен Балкан во Софија, на која се очекуваше двајцата премиери да разговараат за т.н патоказ на идни чекори кои ќе треба да доведат до решавање на спорот. „Очекуваниот датум за преговори за нашата земја ќе превенира стагнирање на реформите и на економските процеси, како и интензивирање на национализмот, и ќе го поттикне инволвирањето на трети страни во регионот“, напиша во друг твитрер пост Заев.

Грчкиот премиер Ципрас пак,пред почетокот на средбата изјави дека „последните метри се најтешки“.

„Направен е напредок, но има уште пат да се изоди, напиша синоќа грчкиот премиер на Твитер во однос на преговорите за името.

Она што засега е извесно за текот на преговорите е дека евентуалниот меѓународен договор кои би го постигнале двете страни ќе треба да се имплементира во фази со што би се избегнала нова блокада од Грција за Македонија да ги започне преговорите со Унијата и да добие покана за членство во НАТО. Со оглед на времето кое преостанува – помалку од еден месец до почетокот на јуни – кога Унијата одлучува за почеток на пристапните преговори и НАТО Самитот што е закажан за јули.

„Решавањето на спорот меѓу Македонија и Грција најверојатно ќе започне со потпишувањето Договор за добрососедство и пријателство каков што беше Договорот со Бугарија. Откако ќе се постигне согласност за спорните прашања, во него ќе се внесат обврските на двете страни. Ќе пишува и дека Грција нема да го попречува влезот на Македонија во НАТО и во ЕУ и во духот на добрососедските односи двете земји ќе соработуваат за унапредување на економските политичките и културните однои. Како и во договорот со Бугарија, ќе стои веројатно дека за спорните прашања од историјата на двете земји ќе се формира комисија која еднаш годишно ќе поднесува извештај до Собранијата на двете земји со цел да се надминуваат спорните прашања“, вели поранешниот амбасадор Ѓорѓи Спасов за НОВАТВ.
Очeкувањата се дека со ваков договор, Македонија може да очекува покана за членство во НАТО и датум за започнување на разговорите за членство во ЕУ.
„На Македонија со еден таков договор ќе и се определи датум  кој  ќе треба да биде ратификуван во Собранието на Македонија и прифатен на Референдум.  Во меѓувреме ќе течат процесите за прием на Македонија во НАТО и во ЕУ. По постигнувањето на Договорот и усвојувањето од страна на Собранието на Македонија, медијаторот Нимиц ќе го информира генералниот секретар на ОН дека е постигнат договор за името меѓу двете страни и новото име ќе ја замени референцата во ОН“, вели Спасов.
Клучни елементи во Договорот ќе бидат: Новото име за кое се преговара (најверојатно Република Горна Македонија-прведено на англиски и одвоено напишано), јазикот на земјата во Обединетите нации да  остане македонски, придавката македонски да може да се користи како трговска марка без ограничување од двете страни, кодовите на земјата остануваат МК и МКД и дека со овој договор не се загрозува правото на етничко и национално самоопределување.
Клучното инсистирање на Грција покрај ова е во Уставот да стои новото име, што би се додало со амандман, но од денот на приемот на Македонија во ЕУ.
Покрај проблемот со името, Македонија ја чекаат и други предизвици на овој пат.
Во дипломатските кругови  се погласно се зборува за дилемите кои ги имаат одредени земји членки на Унијата – дали сега е моментот за проширување на ЕУ. Една од овие земји е секако Франција. Премиерот Заев вчера имаше средба со  Макрон – на која францускиот претседател требаше да се убеди дека Македонија ги исполнува европските реформи.„Не сакам да откријам ништо. Бев многу среќен да се сретнам со целиот тим. Зборувавме многу отворено за сегашната ситуација и многу добрата работа на тимот која е во многу добар правец“, рече кратко Макрон по средбата со Заев за Независен.мк.

Најмалку уште една земја на ЕУ се противи на проширувањето на Унијата со нови членки во овој момент. На Самитот во Софија, Заев ќе се сретне и со германската канцеларка Меркел.

Во ваков амбиент, Македонија може да одлучи и да не прифати ништо во преговорите, ако смета дека ќе дојдат подобри времиња во кои ќе биде можно решавање на спорот или ако смета дека не мора да биде членка на НАТО и ЕУ, коментира за НОВАТВ  екс амбасадорот Спасов коментира дека Македонија.