„Balkan Ninnisi“ или „Балканска приказна“, новата турска серија која се снима целосно во Македонија, е драма-комедија и важи за една од најамбициозните продукции за Турција снимена во странство по долги години. Продуцентот на серијата за НоваТВ, Јалчен Ари вели дека овој проект е создаден, пред сe, да се доближат двете култури, турската со македонската.
Во тек е снимањето на втората епизода, а предвидено е да се снимаат 11.
„Оваа серија се надеваме дека ќе ја достигне и гледаноста на серијата „Долина на волците“. Доколку рејтинзите покажат дека е гледана ќе продолжиме и понатака. Снимањето се одвива во Скопје, но тимот на серијата размислува да продолжи со снимање и низ локациите во Охрид, Битола и другите градови.“, вели тој.
Како што вели Ари, се размислувало серијата да се снима во Турција, но решиле дека гледаноста би била поголема доколку се снима во Македонија.
„Тука има многу значајни места за Турците. Снимањето на една епизода не чини околу 150.000 евра“, вели продуцентот на серијата „Балканска приказна“.
За снимање на оваа серија добивме голема поддршка од македонските институции. Најнапред добивме поддршка од Министерството за култура, од безбедносните служби, полицијата и другите институции како и општините кои ни дадоа дополнителен поттик уште подобро да ја сработиме нашата работа. Тоа е една од причините заради која се одлучивме да го работиме овој проект тука, рече на денешната средба со медиумите режисерот Доан Умит Караџа.
„Balkan Ninnisi“ или Балканска приказна започнува со прикажување на првата епизода на ТРТ1 од утре, 21 јуни со почеток во 19:00 часот по македонско време. Гала промоција на Балканска приказна ќе се одржи и во Скопје, со прикажување на првата епизода од серијата утре, во Куршумли ан во Старата скопска чаршија.
Серијата го привлекува вниманието не само со својата искрена, срдечна и весела приказна, но и со својата маестрална актерска екипа.
Познатиот уметник Ердал Озијаџилар, кој дојде во Скопје по серијата „Елведа Румели“ која се емитуваше пред повеќе години и стана центар на вниманието во Македонија, во серијата го толкува ликот на „Кофтеџи Сулејман“.
Серијата Балканска приказна, во која Ердал Озијаџилар ги дели главните улоги со Озлем Туркад, Емре Беј и Мерих Озтурк, е во продукција на Јалчин Ари и Угур Узунок, а режијата е на Доан Умит Караџа и Волкан Капкин. Освен нив, како актерски имиња се појавуваат и Хакан Бојав, Сузан Акбелге, Сарп Бозкурт, Ѓозде Чиаџи, Џан Колукса, Дениз Ѓуркан, Емине Халил, Сулејман Кара, Ерман Шабан, Каан Тургут, Бурак Рахман.
Во серијата се отсликуваат делови од животот на две семејства, турско и македонско кои живеат од двете страни на реката Вардар, доловувајќи ги шарените културни традиции на два различни народи. Ертан и Јованка главните ликови во серијата, кои образованието го завршиле во странство, се враќаат во
Македонија. Ја бараат среќата, но со тешка борба.
М.Терзиова