Во нашата земја мандатар за претседател на Влада може да биде секој граѓанин кој ќе обезбеди поддршка од најмалку 61 пратеник. Според Уставот, пратениците во Собранието се бираат според волјата на граѓаните, а не според етничката припадност на еден или друг кандидат, изјави лидерот на СДСМ, Зоран Заев за ТВ 21 во врска со објавата на Али Ахмети дека е „време за првиот премиер Албанец“.
Точно е, истакна Заев, дека „граѓаните во нашето општество сè повеќе ги надминуваат етничките бариери, но поважно од тоа е дека при изборот тие се водат пред сè од квалитетите на кандидатот и посебно од неговиот однос кон граѓаните, од неговата општествена посветеност за добробит на сите граѓани и државата, како и личниот пример што како впечаток кандидатот го остава пред граѓаните“
„Доколу СДСМ победи на изборите , јас сум кандидатот за претседател на Владата и ќе бидам премиер кој еднакво се бори за подобар живот на сите граѓани на Северна Македонија, нешто што го докажав низ сите мои политики изминативе години. Соодветно на тоа, доколку ДУИ има ваков услов за коалиција за Влада тогаш ДУИ нема да биде дел од идната Влада“, нагласи Заев.