СДСМ и Движењето Беса во Музејот на Современа уметност означија момент каков што досега немало во македонската политика. Овој 27 февруари ќе остане запаметен како ден кога се формира првата македонско-албанско предизборна коалиција.
Долга е праксата на формирање предизборни етнички мешани коалиции, кои ги предводеле големите партии од македонскиот политички блок, но никогаш досега во неа не партиципирала албанска партија. Во политичкиот простор практично се создава нов блок кој што ја менува досегашната пракса на изборно коалицирање, се надминуваат предрасудите и стереотипите.
Водителките на настанот двојазично, на македонски и на албански јазик, ја претставија коалицијата. Лидерот на СДСМ, Зоран Заев, рече дека нашето општество се менува на подобро и дека денеска моноетничкиот концепт кога партиите се обраќаа само на своите или само на својот етнички кампус е поразен.
„Граѓанскиот концепт едно општество за сите ги победува стереотипите, времето на поделби заминува во историјата. Во ЕУ не се влегува со декларативни заложби за единство, туку со дела“, рече Заев.
На изборите во 2016 година СДСМ беше првата македонска партија која привлече десетици илјади албански гласови, но коалицијата со БЕСА е посебен чин, нов историски момент, како што го нарече Заев, за демократијата и плурализмот.
„Мултиетничкиот карактер го пресликуваме во конкретна програмска и кадровска понуда. Градиме општество кое се темели на еднаквост и правичност, со шанса за сите без разлика на етничка припадност и пол. Сакам јавно да му оддадам признание на лидерот на БЕСА, Билјал Касами, и целото раководство и членство кои покажаа дека имаат политичка храброст, визија и поседуваат вредности и принципи за вистинско граѓанско обединување. Беса е првата албанска партија која го надмина досегашниот амортизиран концепт на домашната политика – етничките гласови да се употребуваат најмногу како бројка за постизборни калкулации за учество во владини коалициии. На нашата заедничка куќа ставаме поцврсти темели. Сите граѓани се исти, без разлика на нивната етичка, верска и политичка определба“, рече Заев.
Според него ова е победничка коалиција.
„Ова е најголема и најразнолика коалиција досега. Затоа е победничка и затоа нема дилеми. Ние сме сигурни победници на 12 април и тоа секому му е јасно. Уште од денес се знае дека на 12 април ќе освоиме сериозно и сигурно мнозинство за формирање Влада. Тоа им е јасно и на нашите политички опоненти“, рече Заев.
Тој им се обрати на другите албански партии и коалиции, порачувајќи им дека нема да дозволат да бидат уценувани.
„Што се однесува до другите албански партии и коалиции, сакам да ја уверам јавноста дека како победничка коалиција нема да дозволиме да бидеме уценувани и нема да прифаќаме непринципиелни преговарања и договарања. Оние кои ќе сакаат да им се приклучат на победниците, ќе треба да ги прифатат нашите принципи и вредности за евентуално да учествуваат во владината коалиција“, изјави Заев
На потпишувањето на договорот за предизборна коалиција со СДСМ, лидерот на Движењето Беса, Билал Касами, исто така гледа како на историски чин и ги повика гласачите да ја поддржат коалицијата којашто ќе овозможи членство во ЕУ и НАТО алијансата.
„Ова е историски ден. Очекувам албанските гласачи да ја искористат оваа историска можност да бидат членови на владејачката коалиција. Оваа коалиција е продолжение на возот за НАТО и членството во Европската унија“, рече Касами.