Премиерот Зоран Заев, придружуван од владина делегација во рамките на официјалната посета на Израел оствари средба со својот колега Бенјамин Нетанјаху.
Во заедничка изјава за медиумите, двајцата премиери испратија порака дека се залагаат за мирот во светот и за продлабочена соработка меѓу двете земји.
„Гледаме заедно кон подобра иднина. Ги разгледуваме начините и полињата каде што можеме да соработуваме во интерес на луѓето и на нашите земји. Научивме од минатото како да ја обезбедиме иднината. Израел е технолошки развиена земја и ќе и помогне на Република Македонија, соопшти израелскиот премиер Нетанјаху.
Премиерот на Македонија пак, нагласи дека за Македонија значат искуствата на Израел во иновациите и старт ап бизнисите, како и дека новата Влада ќе ги употреби израелските искуства за калитетен живот на граѓаните на Македонија.
„Имаме чест да сме во Израел. Го посетивме израелскиот претседател на државата, имавме состанок со бизнис заедницата, посетивме успешни компании коишто почнале како старт ап компании, значајни компании со коишто се надеваме дека ќе имаме натамошна соработка на економско ниво. Со Израел немаме отворени прашања, пријателски земји сме. Нашата соработка со Израел се надеваме дека ќе биде на две нивоа, безбедноста и светскиот мир, она за што е Израел добар пример во светот. Се надеваме дека низ организациите како што е НАТО, целиме да бидеме членка на НАТО, дека ќе продолжиме да соработуваме, бидејки заканите од радикализмот и екстремизмот се присутни овде во Израел и во овој регион, но исто така и за Македонија и за регионот на Западен Балкан“, порача Заев.
Заев ја нагласи и определеноста на Владата за почитување на културното наследство на Евреите.
„Потенцирам дека Македонија со голема почит го негува културното богатство на Евреите во нашата држава. Го одржуваме сеќавањето на жртвите од Холокаустот, со порака никогаш да не се повтори. Во 2011 година, беше отворен Меморијалниот центар на Холокаустот на Евреите од Македонија, а од 2015 година активно се работи кон целосна обнова и рехабилитација на Еврејските гробишта во Битола и изградба на Спомен парк“, рече премиерот Заев.
Нетанјаху на Заев му изразил поддршка за евро-атлантските аспирации на Република Македонија, на заедничкиот ручек кој следел по средбата.
Договорено е продлабочување на економската соработка преку воспоставување на програма за технолошко усовршување и поддршка за иновации. Разгледани се можности, инженери, математичари, претприемачи од Македонија да престојуваат во Израел и да соработуваат со старт ап фирми во високата технологија.