Растот на цените во државата е помал од генералниот раст на цени на светско ниво, тврди премиерот Зоран Заев, одговорајќи на новинарско прашање за време на чествувањето на 75-годишнината од формирањето на Сојузот на здруженија на пензионери на Македонија. Тој кажа дека не станува збор за покачување на цените на прехранбените производи, туку и на металните и други производи.

-1,8% е инфлацијата во моментов и не очекуваме да е над 2,2%, што би било во рамки на нормалата. Затоа претходно за 13% го намаливме ДДВ-то на електрична енергија за да не влијае на покачување на другите цени. Кај нас цената на електричната енергија е останата иста, а имаме и други мерки преку стоковите резерви за да одржиме стабилност на цените, вели Заев.

Тој додаде дека засега нема причина за поскапување на лебот, бидејќи пазарните услови се исти, а воедно државата прави откуп на пченицата за државните резерви и повторно ги пушта во промет во улога на балансер.

Прашан за измените во Законот за облигационите односи, Заев повтори дека е не е дозволиво износот од каматите да биде поголем од првичниот долг, а воедно најави и нова законска измена со која нема да се наплаќаат камати за долг стар повеќе од десет години.

-Застареноста треба да биде пресечена на десет години и каматите над десетте години веќе да не се наплаќаат. Ако доверителите десет години не успеале да ги наплатат каматите, значи дека влезени се во еден круг што ништо нема да значи за банките. Тоа е пресметан ризик и тоа треба да го отпишат, рече Заев.