Премиерот Зоран Заев, на заедничката прес-конференција со помошникот државен секретар за Европа во Стејт Департментот, Филип Рикер истакна дека Брисел треба чесно да се соочи со ситуацијата во која е ставена стратешката определба за натамошно проширување на Унијата со земјите од Западен Балкан и додаде дека ЕУ треба да смогне сили и да го објави решението за проширувањето до Самитот ЕУ за Западен Балкан кој ќе се одржи оваа есен.
– Отворањето на пристапните преговори за членство во ЕУ останува наш највисок стратешки приоритет, а ја користам оваа прилика уште еднаш да го потенцирам она што верувам е јасно и за Брисел, дека билатералните прашања немаат место на преговарачката маса, став за кој недвосмислено се согласивме со Помошникот Државен Секретар Филип Рикер, нагласи Заев.
Тој повтори дека земјава е посветена да работи со добра волја на имплементација на Договорот за пријателство и добрососедство на сите области од заеднички интерес, вклучително и на Комисијата за историски прашања, но, како што вели Заев, има некои прашања за кои не може да се преговара.
– Ја имаме поддршката на САД во овој поглед и таа има огромна важност. Сега повеќе од кога било, едногласни сме дека унапредувањето на регионалната соработка е неминовна за европеизацијата на Балканот, а таа пак е таа е суштински дел од нашиот пат до членство во ЕУ, вели Заев.