Новиот премиер Зоран Заев денеска во Владата ја презеде функцијата од досегашниот премиер Емил Димитриев. Заев беше придружуван од неколку членови од новиот владин кабинет.
Заев откако ја презеде функцијата изјави дека уште денеска ќе даде насока да се отворат портите на зградата, оти, како што вели, верува во отвореноста на Владата.
-Бев запознаен со состојбата во државата, секако таа не е сјајна, но не е и драматична, така беше пренесено. Ние кога ќе ги направиме увидите веднаш ќе соопштиме на граѓаните, но драго ми е што по еден ваков пријателски начин се направи примопредавањето кое што испраќа исто така позитивна порака за граѓаните дека без разлика на политичките околности, нашите политички позиции и некогаш спротивставени со политичките опоненти, сепак на сите им е јасно дека ќе си требаме еден со друг заради граѓаните, заради државата, заради реформите и за сето она што е интерес за граѓаните, изјави Заев.
На новинарско прашање во врска со денешниот вооружен напад врз екс министерот за здравство Никола Тодоров, Заев го осуди и рече дека се уште не ги знае деталите но дека му е драго што поранешниот министер е безбеден и сигурен.
-Ние сме луѓе треба да си помагаме, не треба да испраќаме лоши пораки, рече Заев.
Прашан за тоа како ќе постапи во случајот со директорот на Бирото за јавна безбедност, Митко Чавков, кој се посочува како директно одговорен за организираното насилие во Собранието, Заев вели дека ќе постапуваат по закон и дека намерата им е да ја преземат власта за да може да ја гарантираат безбедноста и иднината на сите граѓани.