Published: Wednesday, February 5, 2020 12:59
Ќе собере ли ВМРО-ДПМНЕ храброст да го избере здравјето на луѓето пред својата страст за лично богатење, прашува лидерот на СДСМ, Зоран Заев преку својот Фејсбук профил. Ваквата негова реакција доаѓа по, како што напиша, вознемирувачките информации и фотографии за несоодветно третирање на медицински отпад во погони на „Еко Клуб“ во кругот на Металски завод во Скопје. Случајот во понеделникот го откри Нова ТВ, а Град Скопје, на вчерашната прес-конференција, го потврди и упати апел до останатите надлежни институции да реагираат.
„Како граѓанин на оваа држава, како родител и како одговорен политичар, не можам да поверувам дека човечки органи и медицински материјали се третирале аматерски со потенцијална опасност за пренесување на зарази врз луѓето. Подвигот на градскиот инспектор да упадне во „Еко клуб“, да направи фотографии и да ја фати на дело фирмата која опасниот отпад го третирала несоодветно, треба да претставува мотив за надлежните институции за што побрзо решавање на случајот. Нема да дозволиме некој да профитира врз здравјето на нашите сограѓани. Заврши времето кога никој не водеше сметка за екологијата и здравјето и кога се замижуваше пред вакви скандали“, напиша Заев меѓу другото на Фејсбук.
Овој случај го става на тест, пред се, Јавното обвинителство кое треба да покаже независност и политичка неутралност во утврдувањето на одговорност на оние кои медицинскиот отпад го претворале во храна за кучиња скитници. Но, овој случај, според Заев, е голем тест и за ВМРО-ДПМНЕ, партија за која фактите говорат дека е поврзана со фирмата која го расфрлала медицинскиот отпад.