На 20 или 21 ноември се очекува првата средба помеѓу преговарачите од Македонија и Грција, со медијаторот за решавање на спорот околу разликите за името Метју Нимиц, најави денеска од Словенија премиерот Зоран Заев.
Тој на прес конференцијата со словенечкиот премиер Миро Церар рече дека било логично по завршувањето на локалните избори, да се направи нов обид за решавање на овој суштествен или чувствителен проблем, а коешто е истовремено пречка за интегративните процеси на Македонија.
-Ние во Македонија се обидуваме да изградиме национален консензус, сите, Претседателот на државата, Владата, опозицијата, но во функција на наоѓање решение, а не на негово одложување. Навистина градиме пријателски односи и со Република Грција. И во ваква пријателска атмосфера, јас верувам лично, искрено, верувам дека може да се најде решение и на ова горливо прашање. Македонија влегува во обид кој што се надевам дека ќе биде последен, со конечна цел, решавање на проблемот кој што Грција го има со нашето уставно име, изјави Заев.