Драгиша Милетиќ не ни побара никакво функционерско, ниту пак пратеничко место за да се приклучи во опозицијата, само сакаше можност да се покае за тоа што згрешил и да учествува во борбата против режимот, рече денеска на прес конференција лидерот на СДСМ, Зоран Заев одговарајќи на новинарски прашања.

„Секој што на еден или друг начин се покајал и одлучил да се приклучи во борбата против режимот е добредојден. Милетиќ побара шанса да се искупи за она што го направил и ние му ја дадовме. Делегатите на партијата и Централниот одбор на конгресот му дадоа право на  претседателот на партијата самостојно да одлучува за ова, така што тука не гледам проблем. Секој има право на свое мислење. Инаку уште еднаш ќе кажам дека овие дебати се повеќе од добредојдени“, рече Заев.

Инаку лидерот на партијата на денешната прес конференција претстави уште еден сегмент од програмата на партијата.

Заев најави генерален реизбор на сите судии во државата.

„Доста страдаа граѓаните и чесните луѓе, додека криминалци и насилници од власта и нивни соработници се на слобода. Ќе ја раскинеме целосно спрегата на несовесното судство со криминалната, корупциска и неодговорна власт на Никола Груевски. Ниеден судија повеќе нема да си дозволи да осудува невини луѓе и нема да смее да помисли да монтира судски процеси. Затоа што криминалците ќе бидат, каде што им е местото. Пред лицето на правдата. Со реизборот во судството, политичарите, извршната власт, ќе мора да ги повлечат канџите од судството! Реизборот ќе се случи по критериуми што веќе во повеќе земји даваат видливи резултати“, рече Заев.

Тој рече и дека бројчаникот што СДСМ ќе го постави на Триумфалната капија ќе покажува како секој денар украдени пари на граѓаните се враќаат и ќе биде паметник за секого, дека за такво вакво зло врз граѓаните, се одговара.