Премиерот во оставка Зоран Заев ден по вториот круг од локалните избори и јавно соопштената одлука дека се повлекува од претседателските позиции во владата и во партијата, ги свика партнерите од коалицијата односно од парламентарното мнозинство на координација во владата, веројатно да ги извести за новонастанатата ситуација но и да се изанализира изборниот скор преточен во градоначалнички и советнички мандати, и да се изгради стратегија што и како  понатаму за изборот на нов премиер.

Дел од коалиционите партнери на Заев, кои ги консултира НоваТВ, велат до овој момент не се известени за средбата, но и дека до сега ваквиот вид состаноци биле редовна практика и е потребно да се одржи со цел да се чуе изворно одлуката за оставка.

Во меѓувреме јавноста и стручната фела ја коментираат актуелната ситуација повикувајќи се на членот 93 од Уставот на Република Северна Македонија во кој меѓу другото стои:

„Оставката на претседателот на Владата, неговата смрт или трајна спреченост да ја врши функцијата, повлекуваат оставка на Владата“.

Според овие одредби од Уставот, освен избор на нов премиер, треба да се бира и нова Влада, од страна на мнозинството во Собранието.

Бидејќи Заев сугерира да нема предвремени парламентарни избори, тоа значи дека новата Влада ќе се крои со гласање во Собранието. Односно, мнозинството пратеници да ја состави новата Влада.
Што се однесува до собранискиот деловник, и тој ја регулира постапката во случај на оставка на претседателот на Владата. 

Според член 219 од собранискиот деловник „оставката на Владата или на претседателот на Владата, се поднесува до претседателот на Собранието во писмена форма и може да се образложи.Оставката претседателот на Собранието веднаш ја доставува до пратениците и до претседателот на републиката”.

Понатаму, во член 220 е предвидено Собранието на првата наредна седница да констатира дека мандатот на претседателот на Владата престанува на денот на седницата.

Заев ја извршуваше премиерската функција од од 31 мај 2017 година, со што освои втор претседателски мандат на 15 јули минатата година. Заев беше претседател на СДСМ од 2013 година. 
(М.Т.)