Премиерот апелира до опозицијата да го поддржи Законот за лични карти. Во меѓувреме, тој најавува решение и за остварување на гласачкото право на граѓаните кои имаат неважечки лични карти.
Тие блокираат, ние наоѓаме решенија. Секогаш ќе правиме максимум за решенија против блокадите што во Собранието ги прават Левица или ВМРО-ДПМНЕ кога блокираат закони и политики од секојдневен, животен интерес на граѓаните. Граѓаните не сакаат кочење, деструкции, уназадување, режим, напиша на својот „Фејсбук“ профил премиерот Зоран Заев.
– Нема да дозволиме таквите политики, спротивни на интересите на граѓаните, да им ги спречуваат нивните основни права. И овој пат не дозволивме 40.000 граѓани кои во моментов се без лична карта да останат без пари, како резултат на несолидарното и неправедно однесување на Левица. Во соработка со Македонската банкарска асоцијација (МБА) најдовме решение за проблемот што настана со граѓаните кои немаат важечки лични карти и затоа не можеа да си подигнат пари од банките и да вршат други трансакции, напиша Заев.
Граѓаните кои имаат неважечки лични карти веќе можат да ги користат банкарските услуги. Банките и штедилниците ќе им ги пирфаќаат и ливчињата од МВР кои се издаваат при фотографирање за лична карта, што е доказ дека се во процедура за издавање на нов документ.
Заев информира дека со министерот за внатрешни работи Оливер Спасовски и со Владата ќе најдат и решение за да се обезбеди гласачкото право на граѓаните кои имаат неважечки лични карти, а се фотографирале за нова.
– Да го обезбедиме уставно загарантираното право граѓаните да не бидат исклучени од избирачкиот список заради застарените лични карти и во соработка со Државната изборна комисија (ДИК) ќе се направи сè за да се изнајдат законски можности за граѓаните со неважечки лични карти да можат да го остварат своето основно демократско право, да можат да гласаат на избори, стои во објавата на профилот на Заев.
Премиерот потсетува дека секоја блокада во Собранието е на штета на граѓаните. Заев апелира до пратениците:
– Во интерес на основните човекови и демократски права, апелирам уште еднаш до опозицијата – запрете со блокадите, граѓаните имаат право на сопствените пари и на сопствениот глас!