Лидерот на СДСМ, Зоран Заев по денешното рочиште за случајот „Монструм“ каде даде свој исказ во улога на сведок, посочи дека доколку не се донесе решение за законот за Јавно обвнителство, Собранието нема да се распушти, но тоа нема да ги одложи предвремените избори. Според него, разговорите мора да продолжат и да се донесе решение, бидејќи законот има исклучителна важност.
„Ако опозицијата се обидува да го минира законот за ЈО, Собранието нема да се распушти. Одложување на изборите сигурно нема. На 12 април се изборите, убаво е да се случи распуштањето на парламентот како што тоа го наведува законот“, рече Заев.
Најавената денешна заедничка средба на парламентарните групи за законот за јавно обвинителство нема да се одржи, поради отсуство на претставниците од ВМРО-ДПМНЕ.
Министерката за правда, Рената Дескоска во текот на денот има одвоени средби со партиите кои имаат амандмани за законот. Пратениците од помалите партии со министерката Дескоска треба да ги изнесат забелешките и да се договорат околу конечниот предлог-текст на законот. Преговорите на Дескоска со помалите партии претставуваат обид да се обезбеди мнозинство од 80 пратеници со цел законот да се донесе до распуштање на Собранието на 12 февруари. Се очекува законот најдоцна до задутре да биде доставен до Собранието, за да се гласа до неговото распуштање.
Претседателот на ВМРО-ДПМНЕ, Христијан Мицкоски денеска сподели статус на својот фејсбук профил каде што вели дека Обвинителството молчи за крупни случаи кои се поврзуваат со криминал, додека власта пробува да турка закон пред изборите, чиј вистински интерес е да се заштити по изборите од одговорност. За ВМРО-ДПМНЕ, како што вели Мицкоски, прифатливо е законско решение кое ќе го изработат и ќе произлезе од самата експертска јавност која беше вклучена во јавната дебата за законот за јавното обвинителство.
„Борбата против криминалот не смее да дозволиме да биде заглавена помеѓу суетите на пар министри и стравот на поранешниот премиер Заев дека ќе мора да се соочи со одговорност. Потребно е квалитетно законско решение а не онакво какво што власта турка на мала врата на само недела ипол пред распуштање на Парламентот. Затоа за ВМРО-ДПМНЕ, со цел да не се робува на суетата на одредени министри и стравот на Заев од одговорност, е прифатливо законско решение кое ќе го изработат и ќе произлезе од самата експертска јавност која беше вклучена во јавната дебата за законот за јавното обвинителство. Да дадеме шанса на професионализмот, знаењето и искуството на експертите и професорите, што ќе биде база за понатамошно усогласување. Да не креираме законско решение за заштита на партиските интереси на поединци, туку решение предложено од експерти кое ќе биде прифатливо за Собранието“, стои во неговиот пост на фејсбук.