Published: Sunday, June 14, 2020 15:56
Итно одржување на изборите е неопходно и екстремно важно за да ги вратиме институциите кои мора да им служат на граѓаните со полн капацитет и легитимитет. Тоа е неопходно и за подобро справување со здравствената и економската криза предизвикана од Ковид-19. Датумот за изборите не е и не може да биде ниту партиска ниту лична желба, тој е одреден од уставот и законите, напиша лидерот на СДСМ, Зоран Заев на неговиот Фејсбук профил.
„На Мицкоски и на ВМРО-ДПМНЕ здравјето на граѓаните воопшто не им е важно. Тоа се само изговори за да нема избори. На средбата кај Пендаровски, Христијан Мицкоски не спомена ниту З од здравје на граѓаните, ниту З од здравство или здравствена криза. Граѓаните тоа го знаат. Впрочем токму Мицкоски шеташе по кафеани и теретани, прекршуваше мерки, а неговиот министер Чулев го поткопува системот одвнатре и го загрозува здравјето на граѓаните. Цели три години ВМРО-ДПМНЕ правеше опструкции, кочници, бојкоти“, истакна Заев на социјалната мрежа.
ВМРО-ДПМНЕ, нагласува Заев, бараше предвремени избори и дадовме предвремени избори. Меѓутоа, според лидерот на владеачката партија, од декември наваму опозицијата измислува изговори само да ги одложи, затоа што, како што вели, знаат дека граѓаните ќе ги казнат и знаат дека ќе загубат.
„Нема веќе бегање, нема одложување. Доста е. Стравот од пораз на изборите не смее да биде причина на било која партија да бојкотира избори или да бара нивно одложување и со тоа да ги става во опасност и народот и државата. Сите законски и уставни услови за одржување на изборите се исполнети. ДИК како извршно тело има обврска да ги спроведе изборите кои по закон и Устав се на 5 јули. За непостапување по законите следува одговорност. Нема да дозволиме Мицкоски да ја втурне земјата во институционална криза, без Собрание и политичка Влада, нема да дозволиме да биде загрозена безбедноста, сигурноста и здравјето на граѓаните“, потенцира Заев.
Тој на крајот од постот порача дека СДСМ не сака избори без опозиција, но ако Мицкоски се одлучи на тоа, ќе покажат што може да направат во еден мандат без саботажи.