„Тоа што е уништено со децении наназад, а посебно во последните 11 години од владеењето на ВМРО –ДПМНЕ, со целото мегаломанство и целата негрижа, навистина е мал периодот за да се врати се во нормала“, рече премиерот Зоран Заев од Охрид коментирајќи ја одлуката на Националната комисија на УНЕСКО да дадат рок од дополнителни две години на Северна Македонија и на Албанија за постапување по препораките и да се избегне поместување на Охридскиот регион на листата Светски културни и природни богатства во опасност.
„ Одлуката ни беше најавена, и мене и на градоначалниците на Охрид и на Струга, а тоа беше дека заштитата од УНЕСКО за Охрид и охридското крајбрежје ќе биде ставена во опасност, но благодарение на сите агрументи кои беа претставени од страна на Општина Охрид, Владата и Министерството за култура, кои што се во постојана дебата, како во текот на вчерашниот ден, така и денеска, навистина се менува сликата заради тие резултати кои досега се постигнати“, рече Заев.
Посочувајќи ги проектите кои се во насока за зачувување на охридкиот регион као заштитено културно наследство, премиерот ја спомена изградбата на колекторскиот систем.
„Целиот дел на ставање на режим на планот за управување со Охрид, чистењето на плажите. Тоа е нашето културно наследство, природно богатство кое мораме да го чуваме и благодарение на тие резултати го свртевме вниманието на сите експерти кои што дискутираа на заседанието на УНЕСКО“, додаде тој.
Заев вели оти бил задоволен што експертската јавноста гледа оти се работи на зачувување на охридскиот регион.
„Сите знаеме дека Охрид ќе продолжи да се развива и мора да се развива. Развојот на Охрид не смее да биде запрен, но тоа мора да биде според план. Ни треба малсимална подрршка од граѓаните“, порача Заев и додаде дека каква и да биде денешната одлука за УНЕСКО, власта ќе мора да ја почитува.
Според претседателот на Владата, главната цел е да се извлече поука од ситуацијата која го довела Охрид да биде тема на дискусија на состанокот на УНЕСКО, да се поправат грешките, а притоа регионот да се развива и да остане да биде атракција која ќе привлекува туристи.
„Размислуваме со градоначалникот на Охрид како да ја продолжиме летната сезона, како да имаме зимска сезона, како да ги развиеме Галичица и Јабланица, како да најдеме дополнителни содржини за да го зголемиме економскиот импакт врз животот на граѓаните. Туризмот му треба на Охрид“, додаде премиерот Заев.