Ние го прифативме барањето на опозицијата да не се создава ново обвинителство, туку СЈО да се припои кон Обвинителството за гонење на организиран криминал и сега повторно има проблем.
Јас се надевам дека никој не го прави ова за да го забошоти и да го заштити криминалот. Тоа нема да го дозволиме – компромис треба но да не ги поминеме црвените линиии. СЈО мора да има иднина, предметите на СЈО, истрагите и предистрагите мораат да имаат иднина “ кажа премиерот Заев денеска во Велес по опожарените места во овој регион.
Заев сепак очекува компромис да се постигне и Законот да се изгласа со двотретинско мнозинство.
Министерката за правда Рената Десковска вчера во Собранието каде започна дебатата за новиот Закон за Јавно обвинителство кажа дека доколку не се постигне компромис со опозицијата, ќе се предложат измени на Законот за судски совет.
„Во случај да не се најде мнозинство за Законот за Јавно обвинителство, сите предмети на Специјалното јавно обвинителство ќе ги преземе и ќе ги продолжи друго јавно обвинителство. Или, со измена на Законот за Совет на јавни обвинители, кој се носи со обично мнозинство, ќе се најде решение за функционирање на Специјалното обвинителство“, рече во Собранието министерката Дескоска.
Со измени во Законот на Советот на јавни обвинители ќе му се даде можност да да назначи вршител на должност Специјален обвинител на местото на Катица Јанева.
Претседателот на ВМРО ДПМНЕ Христијан Мицковски денеска рече дека предлогот на Дескоска е „желба за освета и омраза кон ВМРО ДПМНЕ“.
„Таа повикува и на омраза и освета кон опозицијата не водејќи сметка да направи реформи во правосудството не водејќи сметка да направи реформи во обвинителството нејзина единствена цел е како да се најде начин да се пресмета со политичките не истомисленици“ рече Мицкоски денеска од Берово.
За разрешувањето на Јанева, Советот на обвинители ќе одлучува утре. Доколку донесе одлука за разрешување на Јанева, извештајот треба да го испрати до Собранието, каде најпрво се разгледува во Комисијата за избори и именувања, а потоа за разрешувањето на Јанева гласаат и пратениците со двотреинско и бадентерово мнозинство.
Партиските договарања меѓу СДСМ и ВМРО ДПМНЕ траат со месеци и минимални се шансите да се постигне договор за новиот Закон за јавно обвинителство.