Лидерот на СДСМ, Зоран Заев, вели во ВМРО-ДПМНЕ се свесни дека доколку одат на избори ќе изгубат, бидејќи никој не може да го толерира нивното дрско и безобразно однесување, несакајќи едноставно да ја предадат власта.
– Тоа не може да го сфати ниту еден разумен човек, ниту еден демократ надвор од државата. Мнозинството во парламентот е декларирано и треба да се направи брз и демократски трансфер на власта. Ако се оди на избори тие ќе изгубат и ние би имале неколку пратеници повеќе и Ѓорге Иванов може повторно да не го даде мандатот. Теоретски, да претпоставиме, да добие Никола Груевски 62 пратеника, со која албанска партија ќе склучи коалиција? Тој имаше 62 пратеника па ДУИ пак беше во коалиција. Апсолутно, сето ова кажува дека човекот си игра со чувствата на граѓаните на Македонија и со Република Македонија, вели Заев.
Тој уште еднаш повтори дека нема повеќе ни Тирански платформи, ни платформи на ДУИ на Беса, на Алијанса, на СДСМ, туку програма на идна влада на Македонија која во својата преамбула го има зацврстувањето на унитарноста на Македонија, строго почитување на Уставот и патот кон ЕУ и НАТО.
– Во таа програма 80% се реформи и тоа што ја очекува Македонија и тоа што од нас го очекуваат граѓаните. Но, тука е и економијата и унапредување на квалитетот на живот на сите граѓани, изјави претседателот на СДСМ.
На новинарско прашање дали оценува дека СДСМ ја има поддршката од албанските партии, Заев одговара деја тие се политичка опција со најголема доверба од граѓаните и огромен процент на доверба и од Албанците во Македонија.
– Ние се гордееме со оваа работа. Веруваме во овој концепт на едно општество за сите, тоа е иднината на Македонија. Единство значи унитарност. Како поинаку да го кажам за некој да го сфати дека само заедно сплотени можеме да ја јакнеме унитарноста на нашето општество и нашата држава, а секако тоа да ни биде една позитивна можност да одиме напред. Тоа е иднината на Македонија, потенцира тој.
Тој тврди дека со “албанофобијата“ којашто ја шири ВМРО-ДПМНЕ со погрдни зборови, Македонија нема иднина.