Премиерот Зоран Заев, придружуван од владина делегација во којашто се заменик претседателот на Владата и министер за внатрешни работи, Оливер Спасовски, заменик претседателот на Владата за економски прашања Кочо Анѓушев, како и министрите за економија, Крешник Бектеши и за земјоделство, шумарство и водостопанство, Љупчо Николовски денеска во рамки на посетата на Израел се сретна со претседателот Руевен Ривлин.

Постои искрено пријателство меѓу двете земји но и меѓу граѓаните на двете држави. Република Македонија и Република Израел немаат отворени прашања. Затоа има можности за интензивирање на соработката, констатирано е на средбата.

Како што соопшти владината прес служба, израелскиот претседател Ривлин ги поздрави демократските промени во Македонија и реформските определби на новата Влада, коишто отвораат можности за односите меѓу двете земји.

-Владата е насочена да обезбеди квалитетен живот на граѓаните и мотивација младите да останат да работат и живеат во родната земја. Интеграциите во ЕУ и НАТО и продлабочувањето на односите со пријателските држави, како со Израел, многу ќе придонесе кон тоа, рече премиерот Заев.

Претседателот на Владата додаде дека искуствата на Израел на безбедносен и економски план се драгоцени и дека ќе бидат земени предвид од новата Влада во Македонија.

На средбата е изразена заедничка определба за активности кон заштита на светскиот мир. Исто така договорени се чекори кон економско поврзување на двете земји.

Премиерот Зоран Заев, придружуван од владина делегација и од повеќемина претставници на бизнис заедницата во Македонија, е во официјална посета на Израел.

За време на посетата, предвидени се средби на највисоко политичко ниво, а премиерот Заев ќе се обрати и на Израелскиот совет за меѓународни односи, како и на Бизнис форумот чиј организатор во Ерусалим е Владата на Република Македонија.

Заев во Израел го придружуваат вицепремиерот и министер за внатрешни работи, Оливер Спасовски, вицепремиерот за економски прашања Кочо Анѓушев, како и министрите за економија, Крешник Бектеши и за земјоделство, шумарство и водостопанство, Љупчо Николовски, кои исто така ќе имаат одделни средби во рамки на ресорните области.

Владината делегација попладнево го посети и Меморијалниот центар за жртвите на холокаустот во Ерусалим.

Во името на сите граѓани на Република Македонија, во име на Владата но и во лично име премиерот Зоран Заев изрази почит кон загинатите граѓани и порача, никогаш да не се повтори.