Премиерот Зоран Заев, во врска со бегството на Никола Груевски, денеска изјави дека е информиран за се, но со министерот Оливер Спасовски ќе ги соопштат резултатите кога ќе заврши истрагата.
-Ги знам сите детали, целосно сум информиран. Кога ќе дојде време јас и министерот Спасовски ќе ги кажеме сите детали од истрагата и за делот на внатрешната истрага на МВР и за делот на Јавното обвинителство. Законите во Македонија налагаат дека кога имате налог од Јавното обвинителство истрагата треба да заврши и потоа да бидат соопштени резултатите и ние тоа ќе го почитуваме, изјави премиерот Зоран Заев за текот на истрагата околу бегството на поранешниот премиер и почесен претседател на ВМРО-ДПМНЕ, Никола Груевски, во Унгарија, откако требаше да се јави на издржување на двегодишната затворска казна.
Истрагата се однесува на прашањето кој и како му помогнал да ја напушти територијата на Република Македонија.
Во ЈОРМ денеска соопштија дека предметото е во постапка и добиени се податоци од камерите пред неговиот дом, соседството и граничните премини и дека се уште се утврдува од каде Груевски ја напуштил државата. Се бараат известувања и од институции и податоци од банките.
Од Обвинителството посочија дека доколку се утврди одговорност кај некои луѓе за бегството на Груевски степенот на работење ќе се подигне и предметот нема да биде во предистражна постапка.
Исто така, беше нагласено дека бегството на Груевски не е поврзано со случајот „Диамед Македонија“ и со блокираните сметки на Вера Иванова, сопственичката на “Диамед Македонија” – нејзината приватна во Тутунска банка и втората-странска, која се води на правно лице во Монако.