Украински пилот е убиен, а неговиот борбен авион Ф-16 е соборен во голем руски напад с ракети и дронови во текот на ноќта, соопшти украинската војска. Во соопштението се вели дека ова е трета таква загуба на борбен авион Ф-16 во војната.
Пилотот го користел целото оружје што му било на располагање, соборувајќи седум воздушни цели. При соборувањето на последната, неговиот авион бил оштетен и почнал да губи висина – соопшти воената авијација на апликацијата за пораки Телеграм.
Во соопштението се вели дека пилотот направил сè што можел и го однел авионот подалеку од населбата, но немал доволно време да се катапултира.
Војската објави дека Русија лансирала 477 беспилотни летала и 60 ракети од различни видови во Украина во текот на ноќта, и дека украинските сили уништиле 211 беспилотни летала и 38 ракети. Воздушните напади се евидентирани на шест локации.
Пилотот кој загинал е идентификуван како полковник Максим Устименко, 31 година, соопштија украинските воздухопловни сили. „Починал како херој“, соопштија воздухопловните сили, изразувајќи сочувство до неговото семејство.
Нападот во ноќта на 29 јуни беше еден од најголемите досега, со вкупно 537 воздушни цели – вклучувајќи крстосувачки, балистички и хиперсонични ракети и беспилотни летала „Шахед“ – пријавени од украинските воздухопловни сили и групите за следење.
Ракетниот напад траеше речиси три часа, додека нападот со беспилотни летала траеше речиси десет часа. Цел беа голем број региони, вклучувајќи ги Кременчук, Полтава, Днепар, Николаев, Запорожје, Черкаси, Лавов и Киев.
Десетици експлозии беа пријавени во Кременчук – градот беше погоден и од ракети и беспилотни летала. Индустриски погон се запали во регионот Полтава. Во Запорожје, производствен погон беше оштетен, но немаше жртви. Во Черкаси, три лица беа повредени кога ракетите погодија цивилна инфраструктура, според локалните власти.
Во Лавов, целите беа критична инфраструктура, но официјалните лица изјавија дека немало цивилни жртви или големи штети на станбени згради. Експлозии се слушал и во Киев, каде што беше во акција воздушната одбрана, но не беа објавени дополнителни детали.
Устименко е третиот украински пилот на Ф-16 кој загина во борба откако Украина почна да користи западни борбени авиони минатата година.