Различното толкување на собранискиот Деловник, како што пратениците од СДСМ и ДУИ го дефинираат блокирањето на Собранието со Законот за јазици, се заканува сериозно да ги наруши односите меѓу коалиционите партнери. Компромис за непопустливите позиции на кои реферираат од двете партии ќе се бара на средби на работните групи на партиски функционери.
,,Одлучивме да не брзаме, туку ова прашање подетално да го разгледаме – изјави висок партиски функционер од СДСМ за НОВА.Според него, за амандманите кои не се однесуваат за оценување на уставноста на законот, треба да се гласа. Право на пратеници е да поднесуваат амандмани , и никаде во Деловникот не е наведено дека не смеат да поднесуваат амандмани коментира тој.
Меѓу амандманите што ги поднесе ВМРО ДПМНЕ, голем број се однесуваат и за намалување на казните за државните органи кои се пропишани во законот.
Дел од аналитичарите токму тука гледаат шанса за компромис – парламентарното мнозинство да се согласи да прифати намалување на казните , со што би го отвориле и патот за враќање на опозицијата во Парламентот. Според членот 22 од Законот за јазици, се предвидува казна од 4000 до 5000 евра за органот кој нема да ги спроведува одредбите од законот.
Во ДУИ не се согласуваат да се отвори дебата по кој било од амандманите од ВМРО ДПМНЕ. Од партијата велат дека пратениците не треба да ја оценуваат уставноста на законот, што се бара со амандманите.
Ова го потврди и претседателот на Собранието Талат Џафери кој во емисијата „200“ на телевизијата Алсат рече дека е подготвен да закаже уште една седница на која директно ќе се гласа за донесување на Законот за употреба на јазиците, без да се прифати разгледување на 35. илјади амандмани кои ги поднесе ВМРО-ДПМНЕ.
Според Џафери, ВМРО-ДПМНЕ ќе има право на процедурална забелешка. Тој потврди дека седницата била одложен, бидејќи пратеници на СДСМ се изјасниле дека нема да гласаат за законот, но нагласи дека стабилноста на коалицијата меѓу СДСМ и ДУИ не е загрозена и покрај несогласувањата.
Законот за јазици е трет пат на разгледување во Собранието, откако претседателот Иванов одби да го потпише указот за прогласување на законот, по што ВМРО ДПМНЕ поднесе повеќе од 35 000 амандмани. ВМРО ДПМНЕ тврди дека законот е против уставен и неприменлив и бараат да се повлече – од ДУИ пак неколкупати повторија дека со истот текст се согласила и сегашната опозиција кога преговараа за составување на новата влада.
Законот за јазици беше тема и на викенд средбите меѓу претседателот на ВМРО ДПМНЕ Мицкоски со Ахмети и премирот Заев – но не беше постигнат договор. Како што рече Заев, ако се има малку разум, законот треба да се донесе во Собранието, па кој смета дека не е уставен да го оспори пред Уставниот суд, а не да се блокира Собранието пред вакви важни моменти за изгласување еден куп реформски закони од кои зависи европската иднина на Македонија.
,,Ако почне расправата за илјадниците амандмани на ВМРО-ДПМНЕ за законот за јазиците ќе бидат потребни најмалку 6 месеци за да се завршат сите. Овие амандмани се поднесени за неуставноста и ако се има малку разум ќе се даде можност за законот да се усвои. Собранието не е толкувач дали некој закон е уставен. Уставниот суд е тој што може да се произнесе за законот,, изјави Заев.
Рокот што партите сега си го дале за договор околу Законот за јазици е една недела, но добрите познавачи на приликите сметаат дека е невозможно во таков кус рок да дојде до усогласување на коалиционите партнери- СДСМ и ДУИ.