Предлог законот за употреба на јазици е дел од Рамковниот договор, а имплементацијата на Рамковниот договор е нераскинливо поврзана со процесот на европската интеграција на земјата, соопштија од Кабинетот на вицепремиерот за европски прашања, Бујар Османи, по денешните барања од ВМРО-ДПМНЕ да се тргне европското знаменце од законот за јазиците.
-Низата заклучоци на Советот на ЕУ изминативе години, укажуваат на потребата од целосна имплементација на Рамковниот договор како камен темелник за понатамошно градење на демократско општество со мултиетнички карактер, како рамка за обезбедување на иднината на демократијата во Македонија и овозможување на развојот на поблиски и поинтегрирани односи помеѓу Македонија и евроатлантската заедница, се вели во соопштението.
Во соопштението се објаснува дека Владата ги имала предвид Процесот за стабилизација и асоцијација, преземените обврски со Спогодбата за стабилизација и асоцијација, како и обврските од Пристапниот дијалог на високо ниво и Итните реформски приоритети, преку кои, изготвувањето на предлог законот за употреба на јазиците стана и дел од Планот 3-6-9 за откочување на евроинтегративните процеси, кој беше широко прифатен како од домашната јавност, така и од бројните меѓународни пријатели на Македонија. Согласно деловникот, Владата одлучи на овој Предлог – закон, како дел од процесот на европска интеграција, да му додели ЕПП број 2017.0000.7414. или т.н. статус на европско знаменце, се вели во соопштението.