За Законот за бесправно изградени објекти, претседателот на Собранието, Талат Џафери, вели дека е должен во рок од 30 дена да го врати повторно на разгледување во Собранието.
– На 11 мај е изгласан, најдоцна на 11 јуни треба да се најде на седница. На 8 јуни ќе се најде на дневен ред, информира Џафери на денешниот брифинг со новинарите.
Џафери очекува до 8 јуни да се најде на дневен ред на следната седница барем една од двете интерпелации поднесени за министерот за правда, Бојан Маричиќ, и вицепремиерот за борба против корупција Љупчо Николовски.
Претседателот Џафери денеска најави дека до крајот на овој месец се очекува ребалансот на Буџетот да стигне во Собрание.
– Деновите кога ќе се разгледува ребалансот на Буџетот во Комисијата за финансирање и буџет, тие 10 дена Собранието нема да заседава, информира Џафери.
Во однос на тоа дали има најави за блокада од страна на опозицијата, Џафери посочи дека не може да се раководи од претпоставки. Засега, вели, нема таква најава, но не го исклучува тоа како можност.
Во врска со тоа кој е неговиот став околу изборот на моделот за изборни единици, тој рече дека една изборна единица е несоодветен модел за карактеристиките на нашето општество и држава. Идеален модел, според него, нема, но, моделот за шест изборни единици, како што вели, е најоптимален.
Џафери најави дека наредната седница се очекува да се одржи во редовната сала, но за тоа, како што рече, треба да дадат препорака Министерството за здравство и Комисијата за заразни болести.
Инаку, НОВА ТВ вчера објави дека Предлог законот за легализација на бесправно изградените објекти пред да стигне на пленарна седница за гласање ќе претрпи измени така што крајното законско решение ќе ги опфати само дивоизградените објекти на социјално загрозените категории.