Генералниот секретар на ОБСЕ Ламберто Заниер изрази загриженост за последните случувања во земјата, по завршувањето на денешната посета во Скопје, повикувајќи ги политичките лидери да ѝ стават крај на продолжената политичка криза во интерес на сите граѓани.
„Надминувањето на политичката пат-позиција и враќањето на политичката стабилност мора да бидат највисок приоритет. Клучот за решението лежи во рацете на политичките актери кои треба да се справат со предизвикот и да ја решат кризата за доброто на сите граѓани“ – рече Заниер.
Тој забележа дека резултатите од декемвриските избори во 2016 година овозможија солидна основа за формирање влада и го повика Собранието да започне со работа, согласно демократските принципи и владеењето на правото.
Заниер ги осуди неодамнешните провокативни пораки и инциденти кои би можеле да доведат до влошување на меѓуетничките односи и нагласи дека Охридскиот рамковен договор (ОРД) е од клучна важност за заштитата и унапредувањето на правата на заедниците.
„Ги охрабрувам сите релевантни страни на ОРД да останат посветени на неговата имплементација. ОБСЕ, нејзините институции и Мисијата во Скопје ќе продолжат да се залагаат за мултиетничко и демократско општество и да обезбедуваат помош во областите како што се владеење на правото, избори, демократско владеење и реформа на полицијата. Ги охрабруваме сите актери целосно да ја искористат оваа експертиза“ – рече Заниер.
Утврдувајќи дека е постигнат напредок преку имплементацијата на Договорот од Пржино, Заниер забележа дека враќањето на довербата во институциите е од особена важност.
На средбата со претставниците на организациите со граѓанското општество, тој ја нагласи нивната важна улога во промовирањето на демократското општество и изрази загриженост поради извештаите за притисоци.
Во текот на посетата Заниер се сретна со претседателот Ѓорге Иванов, министерот за надворешни работи Никола Попоски, лидерите на политичките партии ВМРO-ДПМНЕ, СДСМ, ДУИ, Движењето БЕСА, Алијансата за Албанците и ДПА, како и со претставниците на меѓународната заедница.